اسلام آباد۔23دسمبر(اے پی پی)قومی خبر رساں ادارہ ایسوسی ایٹڈ پریس آف پاکستان (اے پی پی) اچ کرسمس سانڳے مسیحی برادری نال یکجہتی کیتے خصوصی تقریب تھئی جیندے مہمان خصوصی منیجنگ ڈائریکٹر اے پی پی محمد عاصم کھچی ہن۔ انہاں کرسمس دا کیک وی کٹیے اتے مسیحی برادری کوں مبارک ݙتی۔
تقریب اچ ایگزیکٹو ڈائریکٹر اے پی پی سبین خان خٹک، ڈائریکٹر نیوز شمائلہ عندلیب، ڈائریکٹر اردو نیوز سروس عبدالجبار زکریا، ڈائریکٹر ویڈیو نیوز سروس رب نواز باجوہ، ڈائریکٹر کورٹ اینڈ کرائم محمد رشید ملک، ڈائریکٹر ایچ آر فارینہ مغل، مختلف شعبیاں دے سربراہان، اے پی پی ایمپلائز یونین دے صدر ملک خضر زمان اتے سیکرٹری محمد ندیم اقبال، اے پی پی دے صحافیاں، ورکرز اتے مسیحی برادری دے ملازمین شرکت کیتی۔ تقریب نال خطاب اچ منیجنگ ڈائریکٹر اے پی پی محمد عاصم کھچی مسیحی برادری کوں کرسمس دی مبارک ݙیندے آکھیے جو پاکستان اچ اقلیتی برادری کوں مکمل آئینی و قانونی حقوق ملیے ہوئن، مسلماناں سودھا ٻئے مذاہب دے لوک وی کرسمس دیاں خوشیاں اچ نال تھی تے ڄڳ کوں اے سنیہا ݙیندن جو پاکستان اچ سارے مذاہب وچال پوری ٻھراٻھرپی اتے ہم آہنگی اے اتے اقلیتاں کوں مکمل آزادی اے، خوشی دے ایں موقع تے ادارہ دے مسیحی ملازمین دا الاؤنس وی ودھایا ڳئے۔
