اسلام آباد۔2جنوری(اے پی پی)وزیراعظم محمد شہباز شریف آکھیے جو معاشی استحکام سیاسی استحکام نال جڑیا ہوئے، 2025ء پاکستان دی ترقی و خوشحالی دا سال اے، ملکی برآمدات ودھین، سمگلنگ ڳھٹی اے، سٹاک ایکسچینج تاریخ اچ بلند ترین اتے 2018ء دے بعد مہنگائی ڳھٹ ترین سطح تے آ ڳئی اے، ولا ودھدی دہشتگردی دا سر لتاڑنا ہوسی۔ اے ڳالھ انہاں اسلام آباد اچ خصوصی سرمایہ کاری سہولت کونسل (ایس آئی ایف سی) دے یارہویں اجلاس نال خطاب اچ آکھی۔ اجلاس اچ وزیراعظم شریک وزراء اعلیٰ، وفاقی وزراء، مسلح افواج دے سربراہ، وفاقی و صوبائی حکومتاں دے افسراں کوں نویں سال دی مبارک ݙیندے آکھیے جو اے سال خیروبرکت آلا ہوسی، آندے ݙینھ ملک اچ ترقی و خوشحالی دا سنیہا ڳھن تے آسن۔ وزیراعظم آکھیے جو پاکستان اچ 2018ء دے بعد مہنگائی 4.1 فیصد دی کم ترین سطح تے اے، بیرونی ترسیلات اچ 5 مہینے اچ پچھلے سال دے مقابلے 34 فیصد ودھارا تھئے، برآمدات ودھین، غیرملکی زرمبادلہ دے ذخائر 4 ارب ڈالر توں ساݙھے 12 ارب ڈالر تھی چکین، بینکاں دا پالیسی ریٹ 13 فیصد تے اے اتے ایندے اچ ٻئی کمی دی گنجائش موجود اے، معاشی اہداف و اشاریے ثبوت ہین جو اے سال پاکستان دی ترقی و خوشحالی آلا سال ہوسی جیندے کتیے ساکوں رل تے محنت کرݨی ہوسی، حکومت کئی چیلنجاں دے باوجود باہمی تعاون اتے اجتماعی کوشاں نال سارے اندرونی و بیرونی چیلنجاں تے قابو پاتے، چاول دی برآمدات دی مد اچ 4 ارب ڈالر، کھنݙ دی برآمدات دی مد اچ ادھ ارب ڈالر قومی خزانے اچ آئن، سمگلنگ تے قابو پاوݨ نال کھنݙ سمگل ہووݨ دی بجائے ہتھو برآمد کیتی اے، سمگلنگ تے 100 فیصد کریک ڈائون نال آئل دی سمگلنگ وی ڳھٹی اے۔ وزیراعظم آکھیے جو آذربائیجان اتے ازبکستان سودھا وسط ایشیائی ریاستاں نال ساݙے بہترین تعلقات ہین اتے او پاکستان نال سرمایہ کاری ودھاوݨ چاہندن، این ایل سی ماسکو تئیں کارگو ڳھن تے سارے شمالی علاقیاں کوں کور کریندا پئے، سعودی عرب، یو اے ای اتے قطر نال بی ٹو بی معاہدے اتے ایم او یوز سائن تھئن، ترقی و خوشحالی اوں ویلھے آسی ڄݙاں ملک اچ سیاسی و معاشی استحکام ہووے، برآمدات ودھائے بغیر ترقی ممکن نئیں، بجلی دا ملھ ڳھٹاوݨ کیتے ݙینھ رات کم تھیندا پئے، محصولات ودھاوݨ کیتے ٹیکس چوری روکݨی ہوسی، بنکاں 3 سال اچ ودھ منافع کمائے، گورنر سٹیٹ بینک اتے حکام اے ڈی آر نال 72 ارب روپے وصول کر تے قومی خزانے اچ جمع کرائن۔ انہاں کراچی پورٹ تے فیس لیس کلیئرنس سسٹم کوں اہم پیشرفت قرار ݙتے۔ انہاں آکھیے جو وفاق اتے صوبے رل تے ٹردے پن، رل مل تے ٹرݨ نال ہی ملک ترقی کریسی۔ وزیراعظم سکیورٹی کوں وݙا چیلنج قرار ݙیندے آکھیے جو ہک واری ول سر چیندی دہشتگردی دا سر کچلݨا ہوسی، دہشت گردی دے خلاف افواج پاکستان، قانون نافذ کرݨ آلے اداریاں دیاں قربانیاں اتے کردار قابل تعریف اے، قوم انہاں قربانیاں کوں سلام کریندی اے۔ وزیراعظم پاراچنار معاہدے کوں خوش آئند قرار ݙیندے آکھیے جو ݙوہیں پاسو سیکڑاں لوک ماریے ڳن، اینڄھے واقعات ول نئیں تھیوݨے چاہیدے، ایں سانڳے ضروری اے جو اساں ذاتی پسند و ناپسند توں ہٹ تے فیصلے کروں۔
