گڏيل قومون – 19 ڊسمبر (اي پي پي) گڏيل قومن ۾ پاڪستان جي مستقبل نمائندي منير اڪرم اسلاموفوبيا تي او آءِ سي جي مستقل نمائندن جي ڪور گروپ جي قيادت ڪندي گڏيل قومن جي سيڪريٽري جنرل انتونيوگوتريش سان ملاقات ڪئي، جنهن ۾ اسلاموفوبيا خلاف گڏيل قومن جي جنرل اسيمبلي جي ٺهرائن تي عمل جو جائزو ورتو. ٺهرائن ۾ دنيا جي مختلف حصن ۾ وڌندڙ مسلمان مخالف جذبن کي روڪڻ جو مطالبو ڪيو ويو. پريس ريليز مطابق اها ملاقات نيويارڪ ۾ گڏيل قومن جي هيڊڪوارٽر ۾ ٿي جيڪا ٺهراءُ 264/78 تي عمل جي سلسلي ۾ فالو اپ هئي. اهو ٺهراءُ 15 مارچ تي منظور ڪيو ويو جنهن جي شرطن تحت 193 رڪني جنرل اسيمبلي ميمبر ملڪن کان مطالبو ڪيو ته هو مذهبي عدم برداشت، ناڪاري دقيانوسي تصورن، مسلمانن خلاف نفرت ۽ تشدد جي خاتمي لاءِ قانون سازي ۽ پاليسي قدمن سميت سمورا ضروري قدم کڻي. ان موقعي تي سيڪريٽري جنرل کي درخواست ڪئي وئي ته هو ان رجحان کي منهن ڏيڻ لاءِ گڏيل قومن جو خاص ايلچي مقرر ڪري. پريس ريليز ۾ چيو ويو ته ملاقات دوران او آءِ سي جي سفيرن ٺهراءُ تي وقت سر عمل خاص طور تي اسلاموفوبيا کي منهن ڏيڻ خاص ايلچي جي مقرري جي ضرورت تي زور ڀريو. هن عالمي سطح تي اسلاموفوبيا جي روڪٿام لاءِ هڪ جامع ايڪشن پلان لاءِ تجويزون پڻ پيش ڪيون.
