اسلام آباد 03- ستمبر(اے پی پی )سندھ دے معروف سرجن ڈاکٹر مرلی دھر آکھے جو شراب پیوݨ جگر دے فیل تھیوݨ سودھا کئی بیماریاں دا سبب ٻݨدے، 2019 اچ شراب نوشی نال 2.6 ملین بندے موئن۔ ورلڈ ہیلتھ آرگنائزیشن 2020 توں 2030 تئیں شراب پیوݨ نال ضیان کوں گھٹ کرݨ دا منصوبہ ٻݨائے۔ معروف سرجن ڈاکٹر مرلی دھر “اے پی پی” نال ڳالھ مہاڑ کریندے آکھے جو اڄوکے ݙینھاں اچ شراب پیوݨ پاروں جگر دی بیماری اچ ودھارا تھیندے، الکحل اچ ایتھینول ہوندے جیڑھا دماغ کوں پریشان کرݨ آلا زہریلا مادہ اے اے لوکیں کوں نشے دا عادی بنڑیندے۔انھاں آکھے جو 2019 اچ صرف ہک سال اچ ڄڳ اچ 2.6 ملین بندے شراب نوشی پاروں موئن جنھاں اچ 2 ملین مرد اتے 6 .0 ملین تریمتیں شامل ہن۔ ڄڳ اچ 400 ملین بندے یعنی 15 سال یا ایں توں ودھ عمر دے بندیاں دی تعداد 7 فیصد اے، لوکیں اچ شعور جگاوݨ دی لوڑھ اے تاں جو او آپݨی حفاظت کرسڳن، ایتھنول نشہ آور تے ضیان ݙیوݨ آلا اے۔ ڈاکٹر مرلی دھر آکھے جو عالمی ادارہ صحت 2020 توں 2030 تئیں شراب پیوݨ آلے ضیان کوں گھٹ کرݨ اچ ہک منصوبہ ٻݨائے۔ ڈاکٹر مرلی دا آکھنڑ ہا جو شراب پیوݨ نال جگر اچ ترائے قسم دیاں بیماریاں تھیندن، پہلا فیٹی لیور، ݙوڄھا الکحل توں متعلقہ ہیپاٹائٹس یعنی جگر دی سوزش اتے تریڄھا الکحل توں سرپوسس اے۔ انھاں آکھے جو جگر انسانی جسم دا ٻہوں اہم حصہ اے، جیکر جگر جواب ݙے ونڄے تاں بندے دا بچݨ اوکھا ہوندے، سرموسس اتے ہیپاٹائٹس دیاں علامات اچ وزن دی گھٹݨ، پٹھیاں دی کمزوری، بخار، ݙیݙھ اچ پیڑ، تھکاوٹ، پیر سڄݨ، اچوی پووݨ، موڈ بدلݨ، نندر اݙݨ، الٹی اتے پاخانے اچ خون، جلد تے خون ڄمݨ دے نشان اتے بیہوش تھیوݨ شامل اے۔ انھاں آکھے جو جگر دے خراب تھیوݨ دا علاج ٹرانسپلانٹیشن اے جیڑھا ٻہوں مہانگا علاج اے جیندے کیتے ساکوں احتیاط ورتݨی چاہیدی اے۔
